Sant’Alfonso Maria de Liguori, oltre al celeberrimo ‘Tu scendi dalle stelle‘,
compose anche, sulla stessa melodia, ‘Quanno nascette Ninno‘, in dialetto napoletano.
Se non piú bello dell’altro, è comunque di sicuro interesse:
[I] Quanno nascette Ninno, a Betlemme,
era notte e pareva miezojuorno.
Maje le stelle,
lustre e belle,
se vedètteno accussí.
e ‘a cchiú lucente,
jette a chiammá li Magge a ll’Uriente.
[II] De pressa se scetajeno ll’aucielle
cantanno de na forma tutta nova:
Pe’ nsi’ ‘agrille,
co’ li strille,
e zompanno ‘a ccá e da llá:
– È nato! È nato! –
– decévano – lo Dio che nce ha creato! –
[III] Co’ tutto ch’era vierno, Ninno bello,
nascetteno a migliara rose e sciure.
Pe’ nsi’ ‘o ffieno,
sicco e tuosto,
ca fuje puosto sott’a te,
se ‘nfigliulette
e de frunnelle e sciure se vestette.
[IV] A no paese ca se chiamma Ngadde,
sciurettero li vvigne e ascette ll’uva.
Ninno mio
sapuretiello,
rappusciello d’uva si’ tu.
ca tutt’ammore,
faje doce ‘a vocca e po’ ‘mbriache ‘o core!
[V] Non c’erano nemice pe’ la terra:
La pecura pasceva co’ ‘o lione
Co’ ‘o capretto,
se vedette
‘o liupardo pazzeá.
Ll’urzo e ‘o vetiello
e, co’ lu lupo, ‘mpace ‘o pecoriello.
[VI] S’arrevotaje ‘nsomma tutt’ ‘o munno:
lu cielo, ‘a terra, ‘o mare e tutt’ ‘i ggente.
Chi dormeva,
se senteva
‘mpiett’ ‘o core pazzeá
pe’ la prejezza;
E se sunnava pace e contentezza.
[VII] Guardavano li ppecori, ‘i Pasture.
E n’Angelo sbrannente cchiú d’ ‘o sole,
Comparette
e lle dicette:
“No ve spaventate, no!
Contento e riso!
la terra è arreventata Paradiso!”
[VIII] A vuje è nato ogge, a Bettelemme,
da ‘o munno, ‘o aspettato Sarvatore
Dint’ ‘e panne
‘o trovarrite,
non potite maje sgarrá,
arravogliato
e dint’a lo presebbio corcato.
[IX] A meliune ll’Angiule calaro
co’ chiste se mettetteno a cantare;
“Gloria a Dio,
pace ‘nterra
No cchiú guerra…è nato giá
lo rre d’ammore
che dá prejezza e pace ad ogni core.”
[X] Sbatteva ‘o core ‘mpietto
a ‘sti Pasture
e ll’uno n’ ‘nfaccia all’ato deceva:
“Ché tardammo?
priesto, jammo
ca mme sento ascevolí
pe’ lo golío
ca tengo de vedé stu Ninno Dio!”
[XI] Zompanno comm’a ciérve ferute,
correttero i pasture a la capanna
Llá trovajeno
a Maria
co’ Giuseppe e ‘a Gioja mia
e ‘n chillo Viso
provajeno nu muorzo ‘i Paraviso.
[XII] Restajeno ‘ncantate a voccapierte
pe’ tanto tiempo senza di’ parola
Po’ jettanno,
lacremanno,
no sospiro pe’ sfogá
da dint’ ‘o core,
cacciajeno, a migliara, atte d’ammore.
[XIII] Co ‘a scusa de donare li presiente
se jetteno azzeccanno chiano chiano
Ninno, no
li rifiutaje
ll’azzettaje, comm’a di’,
ca lle mettette
li mano ‘ncapa e le benedicette.
[XIV] Piglianno confedenzia a poco a poco,
cercajeno licenza a la Mamma.
Se mangiajeno
li pedille
coi vasille, ‘mprimma e po’
chelle mmanelle
e a ll’urdemo, lu musso e ‘i mascarielle.
[XV] Po’ ‘nsieme se mettetteno a sonare
e a cantá co’ ll’Angiule e Maria
co’ na voce,
accossí doce,
ca Gesú facette: Aaaah – ha,
e po’ chiudette
chill’uocchie aggraziate e s’addurmette.
[XVI] La nonna che cantajeno a me mme pare
ch’avett’ ‘a èsse’ chella ca mo’ dico:
Ma ‘nfrattanto
io la canto,
‘mmaggenateve de stá
co li pasture
vicino a Ninno bello vuje pure.
Ninna nanna al Bambinello:
Viene suonno da lo Cielo
Viene suonno da lo Cielo,
Viene e adduorme ‘sso Nennillo;
Pe pietà, ca è peccerillo,
Viene suonno e non tarda’.
Gioia bella de sto core,
Vorria suonno arreventare,
Doce, doce pe’ te fare
‘Ss’uocchíe bell’addormenta’.
Ma si Tu p’esser’amato
Te sí fatto Bammeníello,
Sulo ammore è o sonnaríello
Che dormire te pò fa’.
Ment’è chesto può fa nonna,
Pe Te st’arma è arza e bona.
T’amo, t’a’… Uh sta canzona
Già t’ha fatto addobea’!
T’amo Dio – Bello mio,
T’amo Gíoja, t’amo, t’a’.
[XVII] Cantanno po’ e sonanno, li Pasture,
tornajeno a le mantre n’ata vota:
ma che vuó
che cchiú arrecietto
non trovajeno ‘int’a lo pietto
a ‘o caro Bene,
facevano ogne poco ‘o va’ e biene
[XVIII] Lo ‘nfierno solamente e ‘e peccature
‘ncocciuse comm’a isso e ostinate
se mettettero
appaura,
pecché a ‘o scuro vonno stá
li spurtagliune,
fujenno da lu sole, li briccune.
[XIX] Io pure sóngo niro peccatore
ma non boglio èsse’ cuoccio e ostinato
Io non boglio
cchiú peccare.
voglio amare, voglio stá
co’ Ninno bello
comme nce sta lo voje e ll’aseniello.
[XX] Nennillo mio Tu si’ sole d’ammore!
Faje luce e scarfe pure ‘o peccatore.
Quanno è tutto
niro e brutto
comm’a pece, tanno cchiú
lo tiene mente
e ‘o faje addeventá bello e sbrennente.
[XXI] Ma tu mme diciarraje ca chiagniste
acciò chiagnesse pure ‘o peccatore!
Aggio tuorto!
Ahje! fosse muorto
n’ora primma de peccá!
Tu mm’haje amato
e io, pe’ paga, t’aggio maltrattato.
[XXII] E vuje uocchie mieje, doje fontane
avit’ ‘a fá, de lacreme, chiagnenno.
pe’ lavare,
pe’ scarfare,
li pedille de Giesú
chisá, placato,
decesse: “Via, ca t’aggio perdonato!”
[XXIII] Viato a me si aggio ‘sta fortuna!
Che maje potesse cchiú desiderare?
O Maria,
speranza mia
mentr’io chiagno, prega tu;
penza ca pure
si’ fatta mamma de li peccature.